يا شام

صفوان موازيني

يا شام شو نادرلك ندورة 
لو تطلعي من الحرب مجبورة
نادر غدا سنتين خبز وخلّ
وصيام عاشورة لعاشورة

قاسيونك للجمال مطل 
و بياسمين الشّام مشهورة 
ياما الزّمن غطّ بحلاكي و غلّ
و ياما بعطرك مرمغ دهورة
كنلي أمل بمصيبتك تنحلّ
و يرجع يبان الفلّ بالصّورة 
أو يرجع لأحضانك اللّي فلّ 
و ما شوف فيكي إمّ مكسورة !

تاري البلا مش بس بالمحتل
بالأصل عنّا دياب مأجورة 
و في ناس خلقت بس تا تنذل 
بتموت لو طلعت من الجورة
تخيّلت يتعالى النّهر عـَــ التلّ 
أو يرجعوا أموات قاطورة (1) 
و يرجع ابن شدّاد حيلو انحل
يكتب لعبلة بيوت مكسورة
لكن ببالي ما خطر هالحلّ 
هالجوهرة اللّي برقبة التّاريخ 
تتعلّـق برقبـــة ديمســتورا