نائلة الامام
مع إبدال الهمزة بالقاف …الشوء
…….
شو بحبْ احكي معَكْ
بالشامي
قلكْ يابعد عمري
وياسعد إيامي
مشتاقة متلك لدمّر
وللربوة والهامه
ولجنّة بلودان
كأنّها قدّامي
مشتاقة أرْكِل معك
ب (النوفره )
مشتاقة للبوظة بالقشطه
للملبّس والسكاكر
والقضامه المغبّره
مشتاقه للحميدية
ولسوق ( تفضّلي )
وللبزورية
مشتاقه لسوق ( الصاغه )
تشتريلي خاتم دهب
وإسوارَه عيديّه
مشتاقه لبيت جبري
ولقصر النرجس
يابعد عمري
وقعدة بجبل قاسيون
مع إختي ميسون
والحلوه بنت إختي
تقرالي فنجاني
ولبيت جدي
وخوالي وعمامي
وللقيمرية
ونزار قباني
مشتاقة إبكي ع قبر أمّي
وصلّي علي النبي وسمّي
مشتاقة صلّي بالجامع الأموي
إحكي لمعاوية عن همّي
وإشكيلوا من ناري
ونادي صلاح الدين
لياخد بتاري
على قد شوقي إلِكْ
مابدي ارجعلكْ
سامحيني
مابحتملْ ذلّك
وبسطار محتلّك
مابرجعلك
حالف يميني
إلاّ لشوفو بعيني
بقلب ساحة المرجة
معلّق على حبلكْ
